Di Raffaele Pisani
Omaggio di un vecchio scugnizzo al Sommo Poeta DANTE
LA DIVINA COMMEDIA
INFERNO – Canto Primo –
Trentacinch’anne, l’età mia chest’era
quanno dint’a nu vuosco me perdette:
m’ardeva ’o core comm’a na vrasera,
tenevo ’e ccarne càrreche ’e sanguette.
Avevo abbandunato ’a bona via,
campavo p’’e burdelle e cu ’e carnette.
Comm’era triste ’o vuosco! ’N fantasia,
si ’o veco ancora, ancora mo m’agghiaccio:
a ffronte a isso ’a morte è n’alleria.
Io comme ce trasette nun ’o ssaccio,
e restarrà pe’ sempe nu mistero:
nun ero cchiù crestiano, ero nu straccio.
C’’a tremmarella ch’era forte overo,
io me truvaie a ’e piede ’e na cullina
addò ferneva ’a sérva. Allero allero
spanneva ’o sole ’a luce soia cchiù fina
e cummigliava ’o monte sano sano.
Quanno vedette ’o cchiaro d’’a marina,
m’assicuraie nu poco e cu na mano
’o pietto me tuccaie: assaie cchiù lento
’o core me sbatteva, assaie cchiù chiano.
E comme a cchillo ca, pe’ bia ca ’o viento
’a varca ’n miez’’o mare l’ha affunnato,
ha dda natà cu tutto ’o sentimento
pe’ se salvà, e po’ quanno, spurmunato,
arriva ’n terr’’arena e guarda ’e guaie
e ’o càncaro ’e périculo scampato,
a guardà arreto io pure m’avutaie:
che cosa triste, cupa, abbelenata:
nisciuno ’a llà era asciuto vivo, maie!
Po’ chianu chiano, m’avviaie p’’a strata
ca ncopp’a ’sta cullina me purtava;
ma tècchete na belva nfurïata
me trovo ’e faccia … e comme me fissava:
era nu lïopardo: ’o farabbutto
cu ’e diente ’a fore già m’assapurava…
Io me sentevo scunucchià, distrutto,
guardanno ’e ddoie mascelle marïole;
fuie nu mumento overamente brutto.
Ma po’, me repigliaie, vedenno ’o sole
ca, cchiù lucente ’e ll’oro, ’a miez’’o cielo,
pareva me parlasse cu parole
gentile e chiare: ’o vide chistu velo?
I’ acalo ncopp’a ttutta ’sta tristezza,
e faccio addeventà calore ’o gelo.
Redeva quase st’anema ’e priezza,
quanno po’ nu lïone accumparette:
teneva ’o ffele ’n mocca e na sveldezza
ca ’e me n’avarria fatto doie purpette
si ’e pressa ’e pressa ’a llà nun me scanzava,
e, quanno ’e sta’ sicuro me parette,
’e faccia n’ata bestia s’aparava
e me puntava comm’’o cane ’a quaglia:
era na lupa, ’a vocca chiena ’e bava
aperta tale e quale a na tenaglia,
’e diente comm’’e spate, ll’uocchie ’e fuoco …
’o core me diceva: priesto! squaglia!
si no ’sta lupa, chiena ’e famme e ’e sfoco,
’e te ne fa uno muorzo … e bonanotte!
E ’a chella, overamente, fuie pe’ poco
ch’io me salvaie, e pe’ scanzà sti botte,
stevo pe’ turnà propio ’a do’ ero asciuto,
da ’o vuosco niro cchiù d’’a malanotte,
e mme sentevo già bell’e perduto
quanno vedette n’ombra, l’ombra ’e n’ommo
ca propio nnanze m’era accumparuto,
e ca nun se trattava ’e nu malommo
io subbeto ’appuraie, isso teneva
signate ’n faccia ’e tratte ’e galantommo.
– Pietà! – sultanto ’sta parola asceva
da ’a voce mia, spaventato assaie.
Sultanto aiuto ’o core mio vuleva.
Po’ me facette forza e le spiaie:
– Ma tu, dimme, chi si’? Dimme, ’a do’ viene? –
a ’sti pparole l’ombra suspiraie:
– Io vengo ’a Roma, na città ca tene
iurnate ’e storia scritte p’ogni preta;
d’’a gloria soia ’e ccronache so’ chiene.
Campavo llà cuntento, ero pueta
o tiempo d’ ’e ddie fauze e pagane.
L’opera mia cchiù bella, ’a cchiù cumpleta,
è ’a storia ’e Enea, d’’e tiempe suoie luntane.
Ma tu – rispunne a mme – ccà, che nce faie,
dint’a stu sito triste e fore mane?
Pecché nun saglie ’o monte e te ne vaie
addò ce sta allerezza e ce sta pace? –
Io rispunnette: – Chi ’o ccredeva maie:
ma allora si’ Virgilio, ’o cchiù capace
’e tutte ’alletterate: ncopp’a Dio
te giuro ca cchiù ’e tutte tu me piace.
Tu si’ o’ cchiù bravo; tu si’ ’o masto mio;
i’ ncopp’’e libbre tuoie me so’ mparato;
ogni cumpunimento è n’arrecrio.
Mo vuo’ sapé pecché songo scappato?
Pe’ chella brutta bestia ca sta llà.
E tu, ca si’ ’o cchiù saggio d’’o ppassato,
’a chelli granfe vieneme a salvà. –
Virgilio rispunnette: – Figlio bello,
propio pe’ n’ata parte hê ’a cammenà,
ca st’animale è ’o peggio mustriciello,
p’ ’a strata soia nisciuno s’’a fa fora:
se magna n’ommo comm’a nu paniello.
Ma priesto venarrà ’a Giustizia, e allora
’sta lupa int’a l’inferno iettarrà,
e ogni peccato fatto ’a ’sta mmalora
overo caro assaie farrà pava’!
Sarranno vendicate tutte ’e tuorte,
tutte ll’aggràvie e ogni marvaggità,
sarranno vendicate tutte ’e muorte:
’a vergine Camilla, Eurialo, Niso …
e ’a lupa murarrà senza cunfuorte.
E mmo, mio caro Dante, aggio deciso:
stu viaggo t’’o farraie nzieme cu mme.
Fa’ chello ca dich’io, tutto preciso,
e io te porto subbeto a vvedé
dint’a l’inferno ’a gente comme chiagne,
patisce e se dispera comm’a cché;
che strille sentarraie, e allucche e llagne!
Po, doppo, ’n Purgatorio venarraie;
llà ’o ffuoco ardente scenne da ’e mmuntagne;
gente ca soffre ’e meno vedarraie:
ognuno spera ampressa ’e scuntà ’a pena
pe’ se levà pe’ sempe ’a miez’’e guaie.
si po’ te sentarrie ’e bona lena,
tu ’n Paraviso pure può arrivà:
na femmena cchiù bella ’e na sirena
p’’o cielo azzurro t’accumpagnarrà.
Io nun t’’o pozzo fa’ passà ’o gulio,
nun songo degno ’e chillu posto llà,
pecché me ribbellaie a’ legge ’e Dio. –
– Chello ca dice assaie me dà dammaggio –
io rispunnette – chiagne ’o core mio. –
E po’ cuntinuaie: – Pueta, ’o viaggio
’o voglio fa’ cu te sempe vicino,
pecché ’a sapienza toia me dà curaggio. –
E nzieme ce mettettemo ’n cammino.
