Saturday, Jan. 16, 2021

‘A MADONNA D’’A NOTTE ‘E NATALE

Written By:

|

24 December 2020

|

Posted In:

‘A  MADONNA  D’’A  NOTTE  ‘E  NATALE

All’intrasatta, int’’a nuttata cupa,

na stella d’oro accumparette ‘n cielo…

“Venite…  currite”… alluccava quaccuno…

‘Mparanza ati vvoce , vicine e luntane,

perciavano l’aria: “Currite… guardate

che cielo lucente… miliarde so’ ‘e stelle

ca pittano ’argiento  muntagne e vallate…

Currite, cantate, fenuta è ‘a tristezza,

sanato è ‘o dulore e nun ce sta core

ca tene scurore. Chi chiagne, mo chiagne

pecché stu mumento dà gioja e priezza!

Sentite pe’ ll’aria che pace e armunia…

Na pòvera stalla, ‘a pòvera ch’era,

s’è tutta vestuta ‘e rubine e diamante,

‘sta Luce è na Luce cchiù bella d’’o sole

e fa tutt’’e ccose gentile e affatate,

attuorno nisciuna afflezione ce sta,

né tuorte, né nfamie, né cchiù schiavitù,

è tutta na mùseca d’angele e arcangele…

è nnato nu Ninno ca porta sullievo,

riala salvezza, surrise, cunforto

e dà na speranza pure a cchill’ommo

ca troppo ha patuto e nun spera cchiù…

stu Ninno ha vinciuto ogni male, ogni pena,

stu Ninno ha vinciuto ‘o nniro d’’a morte!

Venite… guardate… è nato Gesù… “

Cu ‘a paglia ch’arunaje d’’a mangiatora,

Giuseppe ‘appriparaje na cunnulella,

e c’’o mantiello

tagliato a ddoje mmità

facette nu cuscino e ‘a cupertella.

Che folla steva for’a chella stalla,

e gente ancora n’arrivava, tanta!

Gesù liggeva dint’’e core ‘e ognuno,

‘sta folla ‘a canusceva tutta quanta,

uommene buone, e quante ne vedeva!…

però vedeva pure ‘e malamente,

gente senza cuscienzia e senza Dio,

‘e peggio malandrine,

‘e peggio delinquente.

E ‘o Bammeniello accumminciaje a chiagnere…

Maria s’’o piglia ‘mbraccio, l’accarezza,

‘o cunnuleja, s’’o vasa, le suspira:

– “Ninno mio bello, nun havé’ appaùra,

io sto vicino a tte, cu tte stongh’io,

sempe vicino mamma te starrà,

sempe vicino.”-

Gesù ‘a guardaje

fisso int’a ll’uocchie…

e nun chiagnette cchiù…

facette ‘o pizzo a rrisa… e s’accuitaje…

                                   Raffaele Pisani                        

 

 

Share This Article

Related News

La donna, dallo Stil Novo a oggi.
La fiera della Vanità
Vittoria repetto 1951-2020. In her Own Words

About Author

redazione

Lorem ipsum dolor sit amet. Leggi il profilo completo, clicca qui

Leave A Reply

Leave a Reply