Un mondo di auguri di ogni bene a tutte le mamme da un vecchio scugnizzo che “legge in napoletano” la meravigliosa poesia “Mia madre” di Edmondo De Amicis.
M I A M A D R E
Niente ha sciupato ‘o tiempo, oj vicchiarella,
niente t’hanno lévato chianto e affanne:
mo tiene sissant’anne
e i’ cchiù te guardo e cchiù me pare bella.
Songo chist’uocchie tuoje na calamita;
tu parle? e ride ‘e gioja chistu core.
Ah, s’io fosse pittore,
te faciarria ritratte tutta ‘a vita!
Te pittarria quanno vicina viene
e io te vaso chella trezza janca,
o quanno triste e stanca
c’’o pizzo a rrisa m’annascunne ‘e ppene.
Ma si cercà putesse a Dio na cosa
nun le cercasse ‘e addeventà Raffaello
p’arritrattà a cciammiello
‘sta faccia toja gentile cchiù ‘e na rosa.
Le cercarria ‘e cagnà cu’ na parola
vita cu’ vita e darte ‘a giuventù,
vederme io viecchio e tu
p’’o sacreficio mio turnà figliola.
Raffaele Pisani