COVID, VICCHIAIA E AMMORE
I’ vularria campà
sultanto ‘nfino a quanno campe tu,
né nu minuto ‘e meno,
né nu minuto ‘e cchiù!
Nun vularria murì
almeno ‘nfin’a quanno chistu core
te sape rialà
schìzzeche ‘e gioia e arcobalene ‘e sole…
e ‘nfin’a quanno
me saccio ancora perdere
int”e surrise tuoje.
Vurria campà
sultanto pe te da’ chillu cunforto
ca io te saccio da’…
Cunforto, ca pe’ nuje ca simmo viecchie,
ce ‘o pò dda’ sulo
chi è addeventato viecchio comm’a nnuje,
tutta na vita mano dint”a mano,
ogni mumento ‘e ogni ghiuorno ‘e ogni anno…
e sape cose
ca sulo nuje sapimmo,
io ‘e te, tu ‘e me…
na guardata sultanto… e ce capimmo…
e quanno
nuvole nere
ce affocano ‘e penziere,
a nnuje ce abbasta, pe’ turnà felice,
nu pizzo a rrisa
e na carezza int”e capille ‘argiento…
A stu traguardo
ce arriva sulamente
chi comm’a nnuje s’è fatto viecchio nzieme.
Propio pe’ chesto i’ vularria campà,
sultanto pe’ te da’ chillu cunforto
ca io te saccio da’… io ca so’ viecchio
e viecchio me so’ fatto nzieme a tte…
Raffaele Pisani
